الحجاز

الحـجــاز و ما أدراك ما الحجـــاز
اللهجة الحجازية مصطلح يطلق عادة على اللهجة الحضرية القديمة لمدن مكة المكرمة، المدينة المنورة، جدة، وينبع، والطائف في المملكة العربية السعودية ، وتختلف عن باقي لهجات دول الخليج وهي تختلف بشكل كبير عن لهجة بادية الحجاز وأريافها التي تصنف ضمن اللهجات البدوية.

وهي لهجة حضرية غير متكلفة وأكثر بساطة تتشابه هذه اللهجة في بعض مصطلحاتها مع اللهجات المصرية و الشامية و اليمنية والحضرمية نظرا لتواجد جاليات كبيرة من هذه الأصول العربية إستوطنت المنطقة قديما
يستبدل صوتا الثاء و الذال عادة بالتاء و الدال على التوالي ، و تستمد اللهجة بعض من

مفرداتها من كلمات عربية فصحى قديمة ، وأخرى معربة ،ويمكن القول بان باقي اللهجات العربية كان لها بعضا من التأثير على بناء اللهجة

الحجازية ولذلك لوجود مكة والمدينة ووصول افواج من الحجاج والمعتمرين والزائرين من شتى انحاء الدول العربية والعالم، عدا عن ذلك تأثير اللغة

التركية نظراً للحكم العثماني الذي دام لأربعة قرون في المنطقة.

واللهجة الحجازية هي أقرب اللهجات العربية للفصحى حتى في مفرداتها ونغمات حروفها

وكما لا ننسى ان اللهجة الحجازية فيها الكثير من الأمثال القيمة وان كانت اللهجة

الحجازيه القديمة التي لم يعد احد يتحدث بها كثيراً الا كبار السن ..

فانها ماتزال عالقه في السنة صغارها ولكن تغيرت قليلاً… وأجمل منطقة تتكلم بهذه

اللهجة هي اهل جدة

الالقاب

في الحجاز وخصوصا مكه في بعض الاسماء يعطوها كنيه او لقب

على سبيل المثال واحد اسمو عبد الله يقولو له : أبو عابد ... وهذي بعضها :

عمر : أبوسراج

حسن : أبو على

حسين : أبو هلال

ابراهيم : أبو خليل

يوسف : أبو يعقوب

عبدالله : عبادي او ابو عابد

عبدالرحمن : الوجيه

عبد الرحيم : أبو رحمه

فيصل : أبو عبدالله

عبد العزيز : عزيز أو ابوسعود

فاطمة : فتو

مريم : منّه

في الحجاز يظهر الاحترام والتربية في تقدير الصغير للكبير وعدم المرور من امامه ..

عندما يكون جالس مثلاً على الارض ..وعدم مد الرجول امام الكبير ..


وأيضا تظهر في التعامل مثل :

لما يطلب منك مثلآ سكينه ..

يقولو الله يخليك اديني سكينة في قلب العدو

لما يقلك كنت ب أكل

يقلك كنت ب أتعشى فضلة خيرك

امثال حجازية



إذا جيت رايح كتر من الفضايح

او إذا جيت رايح كتر من الملايح

حاجه ما تهمك وصي عليها جوز أمك >> خخخ عجبني هذا

ست وجاريتين على قلي بيضتين.

الكبير لما يدلع زي الخشب لما يتقلع . >> ههههههه هذه قويه مره

اللي ماله أم حاله يغم.

كنس بيتك ورشُه ما تدري مين يخشوا.

كل حبه مسوسه لها كيال أعور

الخايبه تتعلق بالحبال الدايبة.

عقربه في الغار ولا ضره في الدار.

أهري وانكتي يا جاره وأنا ثابته زي العماره.

يحسدوا الفقير على موتت الجمعة

سكتنا له دخل بحمارووو

ما قدروا على الحمار تشطروا على البردعة >> خخخ علينا امثال

اذا حلقوا لغيرك بل راسك واستنى ..

حمارتك العرجة تغنيك عن سؤال اللئيم

حبيبك يمضغ لك الزلط .. وعدوك يعد لك الغلط

يا ماخد القرد بماله يروح المال ويبقا القرد على حالو ..

ما تعرف خيري الا لما تجرب غيري ..

دق الطاسه تجيك ألف رقاصه >> خخخخخخ

ابو زيد معروف حتي لو لبسوه خيشة

الأصيلة تنام مع جوزها على الحصيرة.

صار لشخنق بخنق وللحمارصرموجه

خشوني لا تنسوني ولعوه الشمعة وشوفوني …

عمياء تحفف لمجنونة تقولها : حواجبك سود ومقرونه ..

تحفف: تعملها حواجبها ..

يامربي ولد الناس يادق المويه في المهراس

يابخت من بكاني وبكا الناس عليا ولا من ضحكني وضحك الناس عليا ..

رضينا بالهم والهم مارضي بينا ..


اذا اتملت العدوة بطلت المروه ..

قالوا متي طلعت القصر : قالوه امس العصر ..

العروسة للعريس والجري للمتاعيس ..

اكلو الملوخية وصاروا افندية ..

سلامتك والهيل والقرنفل قمامتك ..

الحجر من الارض والدم من راسك ..

اخوانك من امك زي الدهب في كمك

واخوانك من ابوك : زي القوم لما ينهبوك ..

في كل محضر بالتوب الاخضر ..

باب المجلس يقول لباب السطوح : اللى
يجي يجي ..واللى يروح يروح ..

خطبوها اتعززت ..تركوها اتندمت ..

قلبي على ولدي انفطر ..وقلب ولدي على حجر ..

ارضى بقردك لا يجيك اقرد منه ..

من طاحت مخدته قلت مودته





مصطلحات وتعاريف حجازية




العمده .=. كبير الحاره او الحي الذي يرجع اليه اهل الحاره في شؤنهم


المركاز = المكان الذي يجتمع فيه العمده بأفراد حارته


الروشان= نافذه خشبيه كبيره تطل على الشارع ولها اشكال خارجه عن مستوى

جدار المنزل

الطاقه = الشباك ، النافذة

الزقاق= الشارع الضيق

الدهليز= . مدخل البيت او السيب

الكُرته =الفستان

الكٌندره= الجزمه أكرمكم الله

النمليه = دولاب المطبخ



بيت البسه = مكان برفع فيه الاكل والعيش



المغراف= نوع من أنواع الكاسات

بيت الماء = الحمام (دورة المياه ) اكرمكم الله

الكرويته = دكه خشبية كانت توضع في الحوش

المركب =المطبخ

الحليق = السطح الخاص بأعلى

مكان في العمارة أو البيت ( السطوح )

بيت الدرج =مكان تحت الدرج يستعمل كمخزن للأرزاق ( المواد الغذائيه ) >> بيت المونه او السقيفه عند اهل الشام

السحاره = صندوق كبير من الحديد واحيانا من الخشب توضع فيها الملابس

التعميره = الشيشة >> الأرجيلة

الشربوش= غطاء الشيشه

القنعه= العباءة

البيشه = الطرحة أو الغطوة

الصفة= غرفة المعيشة

الجلالة = المفرشة

الصندقة = الحظيرة

البسكليتة = الدراجة

الشماعة = علاقة الملابس

الكوفية = الطاقية

العمة = العمامة

المِمَلك= المأذون الشرعي

الدّبش = جهاز العروسة وعفشها

الداية = القابلة التي تقوم بتوليد النساء : أي الممرضه او الحكيمه

البُقشة = سرة من القماش توضع بها الملابس

فرقنا= البائع المتجول يحمل البقشة على كتفه وينادي فرقنا ( يحمل ملابس ،

أقمشة، ا**سوار ، ... الخ ) >> هذا قديمآ حاليآ اختفت ظاهرة البائع المتجول

الأنيسة = الباص الصغير الذي كان يستخدم لنقل الناس من مكان لآخر ( خط البلدة)

البيزان= او البزان مكان توزيع المياه .. عن طريق السقاء

المرقعة = الدلع والمياعه في الكلام والتصرف

اللغوصة = نقل الكلام وتسبيب المشاكل

الدحلسة = تتمصلح مع واحد عشان تبغى منه شي تقول يدحلس .

الحرمصة =هو عدم الاستقرار النفسي أو انتظار الشيء على أحر من الجمر

مثال ( واحد متحرمص على نتيجته)

المَرمشة أو العرمشة = نهش ما على العظام من اللحم، أو نهش ما على أي شيء من أي شيء

الصمرقع = الازعاج يعني لمن نقول جَبْلِي"جاب لي" الصمرقع يعني جبلي الازعاج الجنان والتوتر

العكننه = التنكيد على شخص معين،

الزفه = عبارة عن تنكتين ( إناء كبير ) يحمل فيه الماء بعصاه تسمى البومبة ..

الخراطه = التنوره >> اول مره اسمع بيها

السحاب =السسته مثلآ سحاب التنوره مقطوع

الدقديق =البطانيه >> كمان اول مره اعرفها

الحنية = مخزن في درج المنزل لحفظ بعض اغراض البيت

السموار= لغلي الماء المخصص للشاي

البزوره =الاولاد الصغار

ستي = ام امي ( جدتي )

سيدي= جدي وتقال ايضآ للاخ الكبير

إستيتة = الأخت الكبيرة

الدادة= مربية الأطفال

دندرمة = ايس كريم

دحديرة = نزلة او منحدر

لا تتحير= لا تتأخر

أستعوقتك = تأخرت علي

هججوني = أزعجوني

قوام = بسرعه او حالاً

تتقصوع = تتمايل في مشيتها وتطيح

حسكل .= كيس من الجلد يستخدم لحفظ النقود

مَدَارِيْه = مراجيح ... (ملاهي )

أتدلك =أتروش ، استحم

أكد شعري =أمشط شعري

ازهمي = نادي علي

مهندز = مهندس

حكيم = دكتور

اندر بره= اخرج

مِدَهْمَلْ= مبهذل

زنبيل = كيس

مخدة = وسادة

زلطة =سَلطة بعد التعديل

جُغمة = شربة ماء أو شفطة من الشراب

لُقمة = قطعة صغيرة من الطعام

معلقة= ملعقة > كانوا زمان يقلبو الحروف

يدعك= يغسل و يفرك

مجغجغ= مليان مويه

الدردبه = الدحرجة

زقلُه = رماه أو ألقاه بعيد

على طبطابي = يعني على مزاجي او على كيفي

مِرَسْتَكَه أو متأنتكة = يعني مرة شياكة .. ومرتبّة

مرحبمبك = مرحبا بك .. بلهجة اهل الغربيه

باطِرمَة = جلسة عربية بس مرتفعة شوية عن الأرض ( مجلس عربي )

ادّحدرت من الدّحديرة= تزحلقت من النزلة

ندرت عينك من حُقّها = خرجت عينك من محلها

شَلْمَة = يعني فجعة .. يعني مثلاً تقول ( اشبك ياواد مشلوم كده عالاكل ؟؟ ) ..

قيّسْتَك = يعني حسّبتك .... توقعتك .... هقيتك ........ ظننتك مثلآ : ( قيستك ياواد حتزل على عمتك فتّو )

بُخْنُق = اللي يتلبس في الراس ويكون مخيّط على قده ( لبس للبنات يغطى به

الشعر ويظهر الوجه فقط )

ومعظم هذه المصطلحات اندثرت لا يعرفها الا الاباء والاجداد



وهذه بعض المصطلحات المتداوله حاليآ

دحين ...... الآن وأصلها الجمع بين كلمتين " ذا " و " الحين " فالأصل أن معنى دحين هو: ذا الحين

هادا ....... هذا وأصلها هذا

ايش ..... ماذا ؟ وأصل هذه اللفظة الجمع بين لفظتين " أي " و " شيء " وهذا جمع تعرفه العرب من قديم.

احنا ..... نحن وأصلها نحن إلا أنه طرأ عليها التحريف

هُمّا ..... هم وأصلها هم وقد طرأ عليها التحريف

هادولا ..... هؤلاء وأصلها الجمع بين " ها " و " دولا " ودولا حرفت من أصلها الذي هو "ذا" وذلك ظناً من الناس مع مرور الزمن

جواز جمع "ذا" ليقال: "ذو" واللام والألف في "لا" زائدة وأصلها من التحريفات.

كمان .... اصل هذا اللفظ من الكلمتين " كما " و " إن " ليكون اصلها كماإن وازيلت الهمزة بسبب سرعة نطق الناس بها.

إِشبك ..... ماذا بك ؟ وأصلها الجمع بين " أي " و " شيء " و " بك " ليكون أصلها : أي شيء بك.

ياواد ....... يا ولد وأصلها يا ولد وحذف اللام كان بسبب سرعة نطق الناس لها.
اندر ...... أخرج ، لعل أصلها غير عربي.

عشان ... لانه ، لعلها غير عربية، وقد تكون عربية

ازهم ...... انادي و تستخدم كمثال في جملة يا فلان ازهم علان ، لا يعرف لها اصل.

ابغى ...... اريد وهي كلمة ايضا عربية صُرفت حيث وردت أكثر من مره في القرآن الكريم.

اسوّيِ .... افعل او اعمل - الاصل في العربية تسوية الشئ أي جعله سويا و يقصد بها فعل شئ معين

دافور...... معناها زمان في الحجاز الفرن او موقد النار ولكن حاليآ صار معناها البنت او الولد الشاطرة في الدراسة نقول عنها دافورة

هبقة ........... زمان اعتقد كان معناها سرقة لكن حاليآ اتغير المعنى فلمن تقول مثلا والله هبقت انا والشباب ورحنا الكباين

فكها ..... يعني افرد وجهك او ابتسم >> لمن الواحد تكون اخلاقو زفت ومرررة طين .. تقولو ياشيخ خلاص فكها ..

كوووووول ............. وتنقال على أي شي يعجبهم او الانسان المتحضر يقولو مره كووول .


فله ........... قمة الوناسه مثلا يلا نروح المكان الفلاني ونفلها يعني نلعب وننبسط بدون قيود ولا قوانين


نص كم ..... حركات لف ودوران : مثلا قول ايش عندك بلا حركات نص كم

روق ........ ريّح ،، يعني روق أعصابك وفي ناس كثير يقولو روق المنقا والمنقا هي المانجو بس بالحجازي والقصد انو تروق دماغك !


دغري ....... على طول او واضح مثلآ كقول انا انسان دغري ما احب اللف والدوران او مثلآ امشي دغري تحصل إشارة على يمينك

استنى ....... انتظر ومنها تجي تصريفاتها مستني وبأستنى

دوبي ...... معناها لساعي ،، او حالآ او في هذا الوقت مثلاً : دوبي رجعت من السوق يعني في هذا الوقت رجعت من السوق او دوبي خلصت شغلي

لسّه , لسّع ..... الى الآن ، بمعنى ماسويت هادا الشي لسع !

ابغى .... أريد وممكن تختصروتصير بدل ابغى ابا مو ، ابي اللي يقولوها النجديين .. شلنا حرف الغاء لانو ثقيل ع اللسان

امكن ، بلكن ...... يمكن

طرطوش ، طرطور ....... معناها درويش او مابيعرف يتصرف !

مخمّج ، معفّن ........ معفن وطلعت ريحتو !

خنفشاري .......... معناها شي رهيب وحلو وغريب ..


مفصعنة .......... متفشخرة و مدلعة بزياادة فممكن تجي قوية المهم صفة مو حلوة ،
ادّيني .......... ناولني أو اعطيني


ودّيني .............. يعني وصّلني ومنها تجي تصرفيات ودّاكي


اتلحلح ، فزّ ، اتزحزح ، حِل .......... كلّها مقاربة لـ أتحرّك أو قوم !


هرجة .......... موضوع نهرج ونتكلم فيه بمعنى " سالفة "

خُــش ........ ادخل

اتشعبط ....... اتسلق

إلين ، علين ..... الى ان

لو تنطنط ، لو تسير عشرة ، لو وقفت على

يدك ....... يعني من سابع المستحيلات

ست هانم ....... باللبناني خانو هيا كلمة توبيخ زي لمن نقول ليش ما حليتي الواجب يا ست هانم !!

مصرفدة ........... مستعجلة

فركِـش .... كنسل او الغى ، زي لما نقول خلاص اتفركش الموضوع يعني اتكنسل وضاع !

مكركبة ، مقربعة ....... يعني معفوسة ومو مرتبة

انفلق ..... انقسم نصفيين اي بمعنى انقلع أو طير

فينك ........ اين انت ؟؟

امصع إدنك ...... كلمة تهزيء .. يعني اجر إدنك

أمزع رقبتك .... اقطع رقبتك

وَيْ ، وَهْ ........ تعجّب ، وَه يَـنداااااامة !!!

وخّر ....... ابعِد

يتتريق ....... يستهزىء

دِفِـش ....... يعني عِفِش وعكـس ناعم

سييب ، سيبو ..... اتركه

عبال . عبالو ...... في ذلك الوقت .. مثلاً اقول عبال ما تخدلك دش اكون سويت الغدا

سكّر أو سكّ .......... أُغلق مثلا سكّر الباب وراك

بطران .......... مريش او غني مثلا هادا فلوسه كتيرة وبطران !

بكّاش ...... نصّاب أو كذّاب

يحقّلّو ...... يحقّ له

حوسَـة ...... غير مرتبة

مُشعتر ......مخربط و ملخبط

مدبّـك او مدبق و مرات تجي ملكلك ..... بمعنى مدبئ عند الشّـوام

تلّيك ، صندل .......... المداس أو الشبشب

لطشة ......... يلطشُ لطشاً تلطيشاً ضربه من الضرب

اتلبخت .......... انشغلت أو أتلخبطت

، أنعزقت .... تقريباً زى انعجقت

حُست ،، إحترت ، مثلاً ماحأقدر أخرج اليوم عشاني محتارة أومعجوقة من كلمة العجأ زي اللبنانيين

لكن انعزقت شوية غير وتجي أقرب على معنى " انحشرت أو انزنقت "

ملاية ........ الشرشف

أتروّش ....... أستحمّ أو أتحمّم اتسبح بلهجت اهل والرياض ونجد

اتلحّف ........ اتغطى باللحاف أو البطّانية

أدّيلو علقة أو افرشة ........ يعني أضربو وعاقبه

برمان ....... دوران !

أسنسير ......... مصعد

بالشقلوب ........ بالمقلوب

مشي حالك ........... كلمة تنقال كتير خصوصاً لما نشوف واحد متضايق أو زعلان فنقولّو مشي حالك الدنيا رح تمشي

يابو الشّـباب ....... مالَها معنى لكنها كلمة تنقال كتير ، مثلاً خلااااص يابو الشباب

في قلب العدو ........... لما تيجي سيرة شي مو كويس

برة و بعيد .......... شبيهة بـ " بعيد الشر عنك "

خِف ...... استعجل ، زي خِفي يدّك يعني استعجلي في الكتابة

تنّحت ........... سرّحت

كونديشن ........ مكيّف

فارقي ......... انقلعي بقوه ، اغربي عن وجهي بالفصحى

فُـكّينا ...... خلصينا

رجّة ........ضجيج

دَعَس ...... داس على الشيء

زيّ الكرتون ...... تنقال للشخص الأهبل والي بد ون شخصية

شاكوش .......... معناها الأصلي طبعاً المطرقة ، لكن حالياً صاروا يقولوها للشخص
المو حلو ، قبيح الشكل ذميم الخلقه

جيّــــــد ........... بتمديد الياء مع تشديدها ، لما تُعجب في شي

قويّـــة ............ بتشديد الياء ، ماله معنى محدد لكنه لفظ دارج ..

هيّــا خير ......... مشابهة لكلمة " الله المستعان "

نمرة و استمارة....... دايما تجي مع كلمة غبي أو أهبل ، مثلا هادا الولد أهبل بنمرة و استمارة !!

لا تدُف ..... شوية شوية ،، مثلاً لما يكون الواحد متحمّس في الهرجة أو معصّب وقاعد يأشّر بيده من التفاعل فتقولّو طيب لا تدف !!

إلا : من صيغ المبالغة ، مثلا زي لما أقول انا مو بس نعسانة أنا إلا نعسانة !

مطحْطَح ، واصِل ......... يعني مررررة واااااااااصِل وملياااان فلوس

يتلسلس .......... يتباطأ في المشي زي الحرامي

جاعوره ........البكاء بصوت عالي ومزعج مثلآ تقول : ايشبو هذا صوتو جِعر ؟؟
اديلو ..... أعطيه





تقاليد وأعراف قديمة






الخطبة

إذا كبر الولد وصارر جال يعتمد عليه على طول اهله يدورون له على عروسه

وحتى البنات متى ماكبرت وصارت ست بيت زوجوها حتى لو عمرها صغير!


الأم من بنتها صغيرة ،

وهي تربيها على تحمل المسؤولية وعلى شغل المطبخ والاحترام والتقدير للكبير والصغير

يبتدو اهل الولد يدورو على عروسة من الأقارب والأصحاب وإذا عجبتهم وحده ، يتفق الأب مع العمدة مثلا ...

احيانا العريس مايدري انهم قاعدين يخططون يزوجونه ...

وحتى لو درى مايقدر يرفض طبعا بيوافق وهو راضي ..كان عيب حد يرفض او يعارض كلام ابوه

ويروحوا جماعة العريس هم والعمدة ( العريفة ) عند اهل البنت واذا حصل نصيب

واتفقوا يجتمع العريس ووالده واقاربه وابو العروسة وأقاربها والعمدة

وينزلون الحرم اذا كانوا من اهل مكة أو المدينة يملكون ويشربون زمزم بنية التوفيق ..

ويرجعون للبيت يسوون لهم عشاء بسيط ..

اما اذا كانت الملكة في البيت يوزعون شربيت وحلاوى لوزية وعسلية ولدو

أو شريك أو تلبينة قبل العشا ولا يخفاكم حركات وتباتيك اهل الغربيه

في تزيين حلاوة الملكة بشرايط والدانتيل واكياس جذابة .. وكل واحد على قده ..





الدّبش



كان التقليد المتبع في الماضي أن يذهب والد العروس وأهلها لمشاهدة المنزل الذي يسكن فيه العروسان،

ولعل من بين أغراض الزيارة التي يقوم بها والد العروس وأهلها لبيت الزوجية هو التعرف على ما يحتاجه المسكن من أثاث ،

وقد كان يطلق على الأثاث مسمى (الدّبش) بشد الدال، وفتح الباء .

وقد كانت عملية إرساله من بيت أهل العروس الى بيت الزوجية

تشكل مهرجان فرح جميل ورائع يؤكد حلاوة الأفراح في تلك الأيام الخوالي،

فلقد كان يؤتى بمجموعة كبيرة من الحمالين، يضعون على رأس كل حامل قطعة من قطع الأثاث.

فللحاف حامل، ولكوز الماء حامل، وكذلك للمسند والمخدة، وتبسي الأكل والصحون وكاسات الشاي والمفرش والفانوس والإتريك.

فلكل قطعة من هذا (الدبش) حامل، ويعبر هذا الموكب دروب الحارات وشوارعها

مشياً على الأقدام في مظهر جميل تصحبه الأهازيج الجميلة وملاحقات الصغار.

حاليآ صار الدبش يتغلف ويلف بالدنتيل والشرايط >> حتى ممكن انهم يودوه احد

المحلات تغلفه مثل نكتار او زهور الريف او بودي شوب >> هذه الناس الي مره فاضيه و تحب الفشخه والمظاهر

ويكون مرتب في شناط وصناديق ...ويكون ارزاق ( مونة الطعام وادوات المطبخ )

واشياء خاصه للعروس من ملابس وعطور واحذيه وكل ما تحتاجه ..

وتاخذه امها و اختها الكبير وعماتها وخالاتها مثلا الحريم الكبار بس ، يعني من خمس الى عشر حريم ...

ويكون في استقبالها في بيت العروس اهل العريس زي امه واخواته وعماته وخالاته

ويستقبلهم بالترحيب والحفاوه وتقدم لهم الضيافه ثم يقومو بترتيب اغراض العروس

في جميع المنزل واماكنها الخاصه وطبعا مايرجعو الا لما تعشيهم ام العريس

وتضيفهم احسن ضيافه وتودعهم بالبخور والعطور.





قطع الستاره

قبل الفرح بسبعه ايام كانوا اهل العروسه يجلسونها ورى ستاره مستاجرينها

مزينه بالترتر والدانتيل والخيوط المقصبة ..

و اصل فكرتها ان البنت تشتغل اشغال كثيرة في البيت فيوم أهلها راح

يريحونها من الشغل والخروج من البيت حيث انها تستقر

فى الستاره للاستراخاء ويطلع لها طلة وقتها قبل وقت الزواج باسبوع

حيت تتميز بلبس جلابية مطرزة ومشغل بالحرير
طبعا يقعدون يركضون ورى العروسة في البيت لحد مايمسكونها ويحطونها ورى الستارة ( خخخخخ عليهم حركات زمان ) ... طبعا زي ماقلت

فيها طراحه ومخدات وشراشف مطرزه يعني تنظيم متعب ...

وخلال هذي السبعة الأيام يقعدون أهلها يأكلو فيها لين تتورد خدودها

اكل طالع واكل نازل ..طبعا اهلها وصحباتها وجماعتها كلهم مجتمعين وكلهم يشتغلون ...

اللي تطبخ واللي تكوي الملابس وترصها في الشناط قبل يودوا الدبش ( العفش ) ومنهم اللي مخصصة للعروسة ...

تهتم في تصفية بشرتها بموية ورد ونشاء ..وحلاوة للجسم كله غير الحمامات المغربية والمشقرة ( والله زمان ) المهم يخلونها تتلامع تبرق ...

ولا تبان ابدا لاي احد علشان تطلع بطلعة يوم النصة وأول مايشوفها عريسها ...

في هذه الايام الخيرات تنزل على اهلها من ذبايح وارزاق والطباخ يطبخ والناس تاكل وفرحانه ومبسوطة ...

وفي الاخير يعملوا حفلة لقطع الستارة إما فطور آو عشاء ، الفطور يفطرو

عند ام العروسه اكلات شعبيه منها العصيده ، الخبز بالعسل والسمن البلدى ،

والفته ، مشروب لازم يعملونه اما فى الصباح او العصر اسمه ملوزاو لوزية وهو عبارة عن حليب، ماء ورد ،هيل ’ نشاء ، رز المهلبية

ويوزعوا على المعازيم بعض الهدايا تكون عبارة عن حناء وعطر عود وحلويات
وهدايا

ويجلسوا الحريم خارج ستارة العروسة ويغنوا عندها بالدف دون ان يدخلون

اما البنات يكون داخل الستاره مع العروسة


الزمة

هذا عاده قديمه لكن غير موجوده ..اصلها كانوا البنات يستحون مره لدرجة البنت لوعرفت انها راح تتزوج تهرب ..

فكان الاب والام يتفقوا على لزمة البنت فى وقت معين هى حركه يجبوا الطرحه او شرشف ويرموا عليها كانهم يمسكونها

وهى تفهم انها الزمت لزوج



ليلة الغمرة

تعتبر من الايام السبعة التابعة لقطع الستارة بس في نهايتها

بعد تزغيد العروس وشغل تلميع الجسم ..يتجمعوا الاهل والاحباب ...

ويجيبوا نقاشة تحني العروسة وكل اللي يبغى من الحاضرات طبعا كله على حساب ام العروسة المسكينة ...

( طبعا من خاطرها محد جابرها تدفع عشان فرحها ببنتها )

تكون العروسة لابسة ثوب يقال له ثوب الغمرة وهو من غمر العروسة بالذهب والثياب حتى لا يبان منها شئ ...منه بنجابي ومنه خليجي ..

ويكون واسع فضفاض ويغطي راسها بطرحة ووجهها ببرقع علشان زي ماقلنا تطلع لعريسها بطلعة ...

وتلبس لها محل ذهب >> صيغة مبالغة يعني من كثر الذهب الي تلبسه...

طبعا اللي ما يقدر، ممكن يستأجر أو زمان كانوا يسلفوا بعض ... ويعملوا لها زفة

ومعها بنات صغار يلبسوا مثلها ومعهاهم مرش ومبخرة وسيوف وعلم بلادي

عشاء الغمرة يسمونه ألتعتيمة ( شريك ونواشف >> جبنة حلاوة طحينية زيتون .....)

و طبعا رقص واغاني ودبك الين 12 مو زي دحين ياذن الفجر والفرح ماخلص

اما في الحاضر فى ناس يعملوا الغمرة في البيت والبعض الاخر يعملوها

فى وقت الدخله يوم الفرح فى قاعة الحفل تنزف بالغمرة في المغرب

و تلبس العروسة بنجابي أو ساري هندي وتلبس الذهب الي اشترته من المهر

واخر السهرة تلبس الفستان الابيض >> على حسب مو كل الناس يسوها

تعليق الراية

طبعا هذي خاصة بالعريس ...ويمكن مشهوره في المدينة اكثر ...

قبل الفرح بيوم تعلق ام العريس رايه ( علم ) اخضر فوق الباب او على سطح البيت اعلان عن ان فرح ولدها بكره ...عاد يتجمعون اقاربها وجماعتها ويسهرو ويتعشو ويغنو ويرقصو وينامو عندها من بكره يقوموا يساعدوها

لا تنسوني و والدى وابني عبدالرحمن رحمهم الله من دعائكم
صور ودعاء لعبدالرحمن رحمه الله